Psa 3 | SwhKC | STEP | Zaburi Ya Daudi Alipomkimbia Mwanawe Absalomu. Ee Bwana , tazama adui zangu walivyo wengi! Ni wengi kiasi gani wanaoinuka dhidi yangu!

Psalms 3

Sala Ya Asubuhi Ya Kuomba Msaada

Zaburi Ya Daudi Alipomkimbia Mwanawe Absalomu.

1 ^aEe Bwana, tazama adui zangu walivyo wengi!
Ni wengi kiasi gani wanaoinuka dhidi yangu!

2 ^bWengi wanasema juu yangu,
“Mungu hatamwokoa.”

3 ^cLakini wewe, Ee Bwana, ni ngao pande zote;
umeniwekea utukufu na kuinua kichwa changu.

4 ^dNinamlilia Bwana kwa sauti kuu,
naye ananijibu kutoka mlima wake mtakatifu.

5 ^eNinajilaza na kupata usingizi;
naamka tena, kwa maana Bwana hunitegemeza.

6 ^fSitaogopa makumi elfu ya adui,
wanaojipanga dhidi yangu kila upande.

7 ^gEe Bwana, amka!
Niokoe, Ee Mungu wangu!
Wapige adui zangu wote kwenye taya,
vunja meno ya waovu.

8 ^hKwa maana wokovu watoka kwa Bwana.
Baraka yako na iwe juu ya watu wako.